Кытайдын лидери Си Цзиньпин Жапаровду шайлоодогу жеңиши менен куттуктады

Кытай Элдик Республикасынын төрагасы Си Цзинпин Кыргызстандагы президенттик шайлоодо көп добуш алган Садыр Жапаровду жеңиши менен куттуктаганын талапкердин шайлоо штабынын басма сөз кызматы 12-январда билдирди.

Анда Кытай лидери Жапаровго ийгилик каалап, “Бир алкак – бир жол” долбоорунун алкагында эки өлкөгө тең ыңгайлуу болгон кызматташтыкты бекемдөөгө даяр экенин айтканы кабарланды.

АКШнын Кыргызстандагы элчилиги Вашингтон Садыр Жапаровду президент болуп шайланды деп тааный турганын билдирген.

Шайлоо жыйынтыгын бир катар эл аралык уюмдар тааныганын жарыялашты. Казакстандын, Орусиянын, Түркиянын, Өзбекстандын, Тажикстандын президенттери, Иран жана Британиянын лидерлери Жапаровго куттуктоо жолдоду.

Кыргызстанда 10-январда 17 талапкер катышкан президенттик шайлоонун баштапкы жыйынтыгына ылайык, Садыр Жапаров 79% ашуун добуш менен алдыга чыкты.

error: Content is protected !!